काठमाडौं । सामाजिक अभियन्ता आशिका तामाङलाई भक्तपुर जिल्ला अदालतले पाँच दिन कैद र पाँच सय रुपैयाँ जरिवाना गर्ने फैसला सुनाएको छ। तर उनी यसअघि नै प्रहरी हिरासतमा पाँच दिनभन्दा बढी समय बिताइसकेकाले थप जेल सजाय भुक्तान गर्नुपर्ने छैन।

भक्तपुरको साँगास्थित झोलुंगे पुलमा शुल्क असुलीविरुद्ध गरिएको विरोध घटनामा उनीविरुद्ध मुद्दा दायर भएको थियो। अदालतले फैसला सुनाए पनि तामाङले प्रहरी हिरासतमा बसेको समय सजायमा काउन्ट हुने भएकाले जेल सजाय भुक्तानी भइसकेको प्रहरी स्रोतले जनाएको छ।

‘हामीलाई औपचारिक जानकारी आइसकेको छैन। तर, सञ्चारमाध्यममा आएको विवरण सही हो भने उहाँलाई फेरि थुनामा बसिरहनु पर्दैन,’ भक्तपुर प्रहरी स्रोतले बतायो।

आशिकालाई यसअघि पशुपति क्षेत्रमा प्रहरीलाई अभद्र व्यवहार गरेको आरोपमा गत माघ २ गते पक्राउ गरिएको थियो। उनी माघ १४ गते १० हजार धरौटीमा रिहा भइन्। त्यसलगत्तै भक्तपुर प्रहरीले सांगाको घटनासम्बन्धी जाहेरीका आधारमा फेरि पक्राउ गरी पाँच दिन जगाती प्रहरी वृत्तमा राखेको थियो। माघ १४ गते नै उनलाई २० हजार धरौटीमा रिहा गरिएको थियो।

सांगाको मुद्दामा जगाती प्रहरी हिरासतमा बसेको समय अदालतको पाँच दिन जेल सजायमा कट्टी भएको हो। तर, तामाङलाई अदालतको आदेशअनुसार पाँच सय रुपैयाँ जरिवाना, ८ हजार ३ सय रुपैयाँ क्षतिपूर्ति र पीडित राहत कोषमा दुई–दुई सय जम्मा गर्नुपर्नेछ।